РУСКИ КЕРЕСТУР – Остатнього тижня жимского школского розпуста, уж по традициї, отримани Каритасов жимски куцик. Того року друженя були каждого вечара од 8. по 12. януар на 20 годзин.
Як визначел волонтер Каритасу Янко Катона каждого вечара на друженьох котри мали и духовни характер дружели ше од 60-80 дзеци од 5 по 15 роки.
У орґанизациї и у активносцох ше визначели волонтере Каритасу штреднього, най повеме, ґимназийсного возросту, алє и старши волонтере котри им помагали же би шицким було цо интересантнєйше.
Духовну часц углавним пририхтовал парох керестурски о. Владислав Варґа котри дзецом бешедовал о швету Богоявлениє Господнє, о значносци швеценей води и пошвецаню вирних и обисцох. Окреме интресантне було духовне стретнуце у котрим волонтере штредньошколци пририхтали тему дзе, на дзецом цикави способ, обробели рисовани филм „Шпунджия (Сунджер) Боб“. По подобох зоз того рисованого указали на позитивни и неґативни подоби у тим рисованим, як и позитивни и неґативни людски особини.
Цо ше друженя дотика, на єдним друженю уж традицийно бул присутни маджионичар Карло Вельки.
Остатнього вечара волонтере орґанизовали маскембал на котрим перше место освоєла Матея Соколович, друге Андрей Надь, треце Ива Сендерак, а за найкреативнєйшу маску була наградзена Тияна Малацко.
