КОЦУР – Централна преслава културней манифестациї „Коцурска жатва” отримана всоботу вечар, 12. юлия у Велькей сали Дома култури у Коцуре. Нашо културно-уметнїцки дружтва зоз руских местох, як з Републики Сербиї, так и зоз Републики Горватскей, ше одволали на поволанку домашнїх и представели ше зоз шпиванками и танцами.
Святочна програма почала зоз интонованьом гимни Републики Сербиї „Боже правди” и руску шветочну шпиванку „Браца Русини”, а потим присутних привитали предсидатель Националного совиту Руснацох Йоаким Рац и предсидатель Општини Вербас Милан Ґлушац.
Тогорочну програму зоз шпиванками отворела Жридлова шпивацка група КУД „Жатва” зоз провадзеньом оркестра КПД „Карпати” з Вербасу под руководством Любомира Сакача Андрия. Под руковдством истого оркестра ше зоз шпиванками представело КПД „Карпати” зоз Вербасу, а перши блок зоз шпиванку завар Павле Медєши.
Перши ше з танцом представели Дом култури зоз Руского Керестура з провадзеньом оркестра под руководством Кристияна Нярадия. Потим ше публики представела шпивацка ґрупа зоз КПД „Дюра Киш” зоз Шиду, як и КПД „Драґутин Драґен Колєсар” зоз Бачинцох, фолклораше зоз КУД „Тарас Шевченко” зоз Дюрдьова, а потим и члени КУД „Йоаким Гарди” зоз Републики Горватскей. Тоту часц вечаршей програми заварли ветеранє зоз Руского културного центру з Нового Саду. Потим наступела шпивацка ґрупа зоз КУД „Др Гавриїл Костельник” зоз Кули, зоз шпиванку ше представели и мишана шпивацка ґрупа Дружтва Руснацох зоз Суботици. Члени Дружтва „Руснак” зоз Петровцох у тей часци програми одшпивали вецей шпиванки. На концу святочного концерту домашнї, млади танцоше зоз фолклорней ґрупи КУД „Жатва” одтанцовали Руски танци, а числена публика їх точку за конєц тогорочней „Коцурскей жатви” випровадзела зоз моцним аплаузом.
На концу програми предсидателька КУД „Жатва” Мелания Мали подзековала шицким котри пришли на тогорочну културну манифестацию „Коцурска жатва”, и тим котри финансийно и на други способи помогли же би ше тоту традицийну манифестацию отримало. Окремне подзекованє Малийова уручела руководительком дзецинскей фолклорней ґрупи КУД „Жатва” Александри Горняк и Катарини Горняк, як и предсидательки Етно клубу Аранки Медєши и Ради Лазор.
Святочни концерт провадзели и директор Заводу за културу войводняских Руснацох Саша Сабадош, представнїк Туристичней орґанизациї општини Вербас Михайло Киш, директорка Основней школи ,,Братство єдинство” Сенка Мученски, заменїк предсидателя Месней заєднїци Коцур и заменїк предсидателя НСР Стеван Самочета, члени Националного Совиту Руснацох, його одборох и роботних целох, представнїки наших установох, институцийох, културно-уметнїцких дружтвох, вирских заєднїцох, здруженьох и други.
Окрем Културно-уметнїцкого дружтва „Жатва”, отримованє културней манифестациї „Коцурска жатва” помогли Покраїнски секретарият за образованє, предписаня, управу и национални меншини – национални заєднїци, Покраїнски секретарият за културу, Општина Вербас, Туристична орґанизация општини Вербас, Национални совит Руснацох, Роботне цело за младих Националного совиту Руснацох, Завод за културу войводянских Руснацох, Културни центер Вербас, Дом култури Коцур, Месна заєднїца Коцур, Основна школа „Братство єдинство” Коцур, Ловарске дружтво „Сокол” Коцур, Етно клуб „Одняте од забуца” Коцур, Месара „ТриС” Коцур, Месара „Супермикс” Коцур, Козметични салон „Ґламур” и Добродзечне огньогасне дружтво Коцур.
