РУСКИ КЕРЕСТУР – У Руским Керестуре на нєдзелю, 11. юния, од 9-15 годзин у центре валала будзе перши Гуманитарни базар. Зберац ше будзе пенєж за лїченє двох дзивчатох зоз кулскей општини – Уну Вуканац з Червинки и Машу Плесконїч зоз Сивцу.
За базар мож донирац даяки свойо услуги лєбо продукти котри ше ту буду и предавац, а пенєж будзе наменєни за спомнути циль, та орґанизаторе поволую цо вецей жительох.
Базар орґанизую 6 дзвивчата з Керестура – Николина Зорич, Настася Надь, Ваня Петкович, Андрея Югик, Мария Малацко и Сабина Планчак, а на идею Зоричовей, хтора до нєдавна була членїца гуманитарного здруженя 1000 за 1000, чия робота була унапрямена на зберанє пенєжу за лїченє хорих дзецох у кулскей општини.
По словох Зоричовей, за керестурски базар ше уж приявели велї донаторе, а на вашаре буду и дзивчата котри рисую по тварох и плєту варґочики.