15. СЕПТЕМБЕР – Нєшка Медзинародни дзень демократиї.
1890 – Народзела ше писателька Аґата Кристи (Торки, Зєдинєне Кральовство, 15. септембер, 1890 – Волинґфорд, 12. януар 1976), авторка популарних криминалистичних романох и театралних фалатох.
1894 – Народзел ше филмски режисер Жан Реноар (Париз, Французка, 15. септембер 1894 – Беверли Гилс, ЗАД, 12. фебруар 1979), бул и сценариста, продуцент и писатель а часто ґлумел у своїх филмох. Бул син маляра Оґиста Реноара, творец поетского филмского реализма.
1961 – Народзела ше ґлумица Соня Савич (Чачак, 15. септембер 1961 – Беоґрад, 23. септембер 2008).
1987 – Нємецки хакере, познати як Гаос клуб, упадли до компютерскей системи НАСА (National Aeronautics and Space Administration) и инсталовали програму хтору наволали Троянски конь.
1997 – Ґуґл урядово реґистровал домен www.google.com.
2012 – У Руским Керестуре Руски народни театер Петро Ризнич Дядя премиєрно виведол представу Обласни шпиталь Христи Бойчева, болгарского писателя, у режиї Владимира Надя Ачима, а у виводзеню керестурских ґлумцох. Улоги: Славко Орос у улоги Контузова, Михал Варґа у улоги Дїда, Мирослав Малацко – америцки Ґенерал, Михайло Зазуляк – Вилиям, Емил Няради у улоги Братоя, Ненад Канюх – Федор, Любица Дудаш – Дохторка, Любомир Дудаш – Медицинар, Ксения Макаї Орос – Баба, Снежана Малацко – Жена. Костимоґрафка тей представи була Таня Орос, вибор реквизитох Дарян Гарди, майстор шветла Желько Пашо, майстор звука Владимир Бесерминї, суфлерка Таня Арва-Планчак, а майстрове Дюра Хома и Звонко Олеар.
Проєкт софинансовал Покраїнски секретарият за културу и явне информованє АП Войводини.
Нєшка Медзинародни дзень демократиї. Датум одредзени на Ґенералней скупштини Зєдинєних нацийох 2007. року.