21. СЕПТЕМБЕР – На нєшкайши дзень народзена Серафина Макаї, дзивоцке Буила (1945–2026).
1846 – Народзел ше политичар и писатель Светозар Маркович (Заєчар, 21. септембер 1846 – Трст, нєшка Италия, 10. марец 1875)
1866 – Народзел ше писатель Херберт Джордж Велс, родоначальнїк науково-фантастичней литератури, автор велїх популарно-наукових, историйних, социялних и фантастичних романох и приповедкох.
1923 – Народзела ше учителька Мария Ракич, дзивоцке Копчански (Дюрдьов, 21. септембер 1923 – Бачинци, 12. юний 2009). По законченей велькей матури у Новим Садзе и Учительскей школи у Вербаше, пришла 1945. року до основней школи у Бачинцох и ту робела полни роботни вик по 1980. рок, кед пошла до пензиї. Учела велї ґенерациї школярох по руски, потим преподавала у оддзелєньох по сербски, а руски язик тримала як язик дружтвеного штредку. Зоз бачинскима школярами и младима рихтала театрални фалати, режирала, учела танци и шпиванки. Умарла у Бачинцох, 12. юния 2009. року у 86. року живота.
1945 – Народзела ше писателька и просвитна роботнїца Серафина Макаї, дзивоцке Буила, (Коцур, 21. септембер 1945 – Коцур, 7. януар 2026). Основну школу закончела у Коцуре, а Висшу педаґоґийну школу у Зренянину на ґрупи за сербски язик и литературу. Робела як библиотекарка у Читальнї у Коцуре, у Стреднєй школи у Вербаше, а по одход до пензиї як наставнїца сербского и руского язика и литератури у ОШ Братство єдинство у Коцуре. Написала историю коцурскей Читальнї, у коцурскей школи велї роки водзела литературну секцию. Серафина Макайова писала поезию и прозу, драми за дзеци, як и монодрами. Обявени єй вецей кнїжки: Фестивал животиньох, Вчера сом ше ошацовал, Бавме ше на бини и други. Твори єй обявени у зборнїкох и антолоґийох, а написала и вецей монодрами и велї гумористични тексти, а писнї єй компоновани за музични фестивали. Мальовала на склу, и отримала вецей самостойни вистави, а участвовала и на заєднїцких виставох, а участвовала и на подобових колонийох. Була членїца Дружтва за руски язик, литературу и културу од 1974. року, Дружтва писательох Войводини, Литературней секциї у Коцуре и Дружтва подобових уметнїкох аматерох у Вербаше. Жила зоз фамелию и творела у Коцуре, дзе є и похована 9. януара 2026. року.
1948 – У Дюрдьове основане Културно-просвитне дружтво Тарас Шевченко.
Нєшка Медзинародни дзень мира.