7. СЕПТЕМБЕР – На нєшкайши дзень народзел новинар Венямин Бульчик (1946–2025).
1909 – Народзени филмски режисер Елия Казанджоґлу, познати як Елия Казан (Истанбул, 7. септембер 1909 – Нюйорк, 28. ссептембер 2003), бул и сценариста, продуцент и ґлумец. Наградзени є зоз Оскаром за найлєпшого режисера и зоз Оскаром за животне дїло.
1914 – Народзел ше физичар, професор на Универзитету держави Айова, ЗАД, Джеймс Алфред ван Ален (Маунт Плезант, ЗАД, 7. септембер 1914 – Айова Сити, 9. авґуст 2006), котри одкрил два пасма змоцнєного зарйованя котри обколєшую Жем. Пасма у форми персценя наволани познєйше Ван Еленово радияцийни пасма, а одкрил их з помоцу Ґайґер-Милерових чишлячох котри 1958. року поставени на штучни сателити Експлорер 1 и Експлорер 2.
1946 – Народзел ше новинар Венямин Бульчик (Шид, 7. септембер 1946 – Шид, 2. новембер 2025), бул длугочни новинар Радио Шиду и дописователь Радио телевизиї Войводини и новинох Руске слово. Венямин Бульчик окрем же бул новинар у Шидзе, бул и поета и дружтвено политични роботнїк, ґлумец аматер, култруни дїяч и длугорочни член КПД Дюра Киш. Ґлумел у велїх театралних представох у КПД Дюра Киш, обявена му збирка поезиї Заря и цинь. Бул и член Дружтва за руски язик, литературу и културу oд 1975. року, як и член и вецейрочни секретар Здруженя за борбу процив диябетесу у Шидзе. Венямин Бульчик умар 2. новембра 2025. року, спочива на теметове у Шидзе.
Нєшка ше означує Медзинародни дзень чистого воздуху (International Day of Clean Air for Blue Skies), хтори преглашела Ґенерална скупштина Зєдинєних нацийох 2019. року же би ше спозорело на уплїв заґадзеного воздуху на здравє людзох и климатски пременки.