9. АПРИЛ – На нєшкайши дзень народзела ше Ирина Ира Натюк.
1683 – Французки виглєдовач Рене Робер Кавелиє, сер де Ла Сал преглашел вельку територию у Америки за маєток Французкей и наволал ю Луизияна, на чесц кральови Луйови Штернастому.
1821 – Народзел ше французки писатель Шарл Пєр Бодлер (Париз, Французка, 9. април 1821 – 31. авґуст 1867).
1926 – Народзени Хю Хефнер (Чикаґо, ЗАД, 9. април 1926 – Лос Андєлес, 27. септембер 2017), америцки публициста, продуцент, снователь и главни редактор маґазина Плейбой.
1940 – У Беоґрадзе отримани Перши конґрес студентох Югославиї, на хторим 127 делеґати Беоґрадского, Заґребского и Люблянского универзитета зоз декларацию одлучно осудзели империялистичну войну и виражели порихтаносц студентох и младежи, вєдно з народом, предлужиц борбу процив уцагованя жеми до войни.
1948 – Народзела ше длугорочна лекторка и прекладателька за руски язик Ирина Ира Натюк, народзена Ковач (Бикич, 9. април 1948 – Нови Сад, 15 марец 2021). Филозофски факултет закончела у Новим Садзе. У младосци була активна шпивачка, участвовала на велїх културних манифестацийох, а ма и векше число знїмкох руских шпиванкох у фонотеки Радио Нового Саду. Робела як професорка руского язика у керестурскей Основней и штреднєй школи Петро Кузмяк, як и на лекторских и прекладательних роботох у Руским слове, Рускей редакциї Радио Нового Саду и Прекладательней служби Секретарияту за образованє, предписаня, управу и национални меншини/национални заєднїци, одкаль пошла до заслуженей пензиї. Ирина Натюк була член Дружтва за руски язик од снованя и вредни член Секциї лекторох и прекладательох, дзе дала конструктивне доприношенє розришованю нових терминох и виразох на наш язик. Ирина Натюк похована на Городским теметове у Новим Садзе, 20. марца 2021. року).
2002 – Парламенти Сербиї и Чарней Гори прилапели спорозуменє о утаргованю Союзней Републики Югославиї и твореню союзу Сербиї и Чарней Гори.