НОВИ САД – Студенти зоз Беоґраду, вечар 31. януара пешо сцигли до Нового Саду, дзе их на Варадинским мосце дочекали новосадски студенти и велї гражданє.
На Варадинским мосце беоґрадски студенти дочекани зоз червеним тепихом и огньометом, зоз новосадскима студентами розменєли застави двох Универзитетох, беоґрадского и новосадского и вєдно прешли прейг моста. Колона ишла од моста по Єврейскей улїци и по Булевару ошлєбодзеня по Желєзнїцку станїцу, дзе положене квеце и отримана 15-минутова цихосц за настрадалих у нєщесцу 1. новембра 2024. року.



Беоґрадски студенти, 30 януара пешо рушели зоз Беоґраду до Нового Саду же би ше 1. фебруара придружели колеґом у блокади трох мостох.
Варадински мост, Жежельов мост и Мост шлєбоди булу блокирани 1. фебруара, на Дзень городу Нового Саду и на 3 мешаци як страдали 15 особи кед спадло бетонске надкрице на Желєзнїцкей станїци.

Скорей як цо пешо сцигли беоґрадски студенти, до Нового Саду сцигли и бициґлисти хтори зоз Беоґраду рушели на бициґлох. Медзи нїма бул и Михайло Ковач зоз Ґимназиї „Йован Йованович Змай” и гварел же вони пейцме рано пошли до Беоґраду и зоз беоґрадскима бициґлистами пришли до Нового Саду. Тиж додал же их през цалу драгу обезпечовала полиция и авто швидкей помоци же их вшадзи людзе радосно дочековали зоз кляпканьом и же мали паузу у Индїї. Новосадянє их на Варадинским мосце дочекали зоз вечеру, а потим бициґлисти предлужели на Желєзнїцку станїцу дзе их чекали новосадски бициґлисти.


Драматурґ и писатель Синиша Ковачевич сообщел 31. януара же студенти зоз Сербиї и официйно кандидати за Нобелову награду за мир.
