Отримана манифестация „Пришли нам Русадля“ (фото)

автор Вл. Дїтко
588 Опатрене

БИКИЧ – На швето Сошествиє Святого Духа, познатше як Русадля, вчера отримана традицийна културна манифестация „Пришли нам Русадля” у орґанизациї КПД „Иван Котляревски”.

Шветочни концерт у Доме култури отворели домашнї, шпивацка ґрупа КПД „Иван Котляревски” зоз шпиванку „Русадля, Русадля”. Потим наступели наймладши, Дзецинска ґрупа спомнутого Дружтва зоз пригодним дзецинским танцом.

„Бикичанки” ше представели зоз шпиванками, як и Старша шпивацка ґрупа КПД „Дюра Киш” зоз Шиду, хтора шпивала руски и сербски народни шпиванки, а шпивацка ґрупа СКУД „Єднота” зоз Шиду виведла венчик словацких народних шпиванкох.

През шпиванку ше представели и школяре хтори уча руски язик з елементами националней култури у основних школох шидскей општини, а порихтала их наставнїца Наташа Еделински Миколка. На концерту наступели и госци зоз КУД „Осиф Костелник” з Вуковару и то дует хтори одшпивал два шпиванки.

Опрез будинка школи етно штанди мали здруженя женох „Маря” зоз Шиду, „Радосц” з Бачинцох, „Жридло”, з Беркасова „Филип Вишнїч”, з Вишнїчева и „Моровичанки” з Моровичу.

На концу манифестациї ше танцовало и шпивало коло „майового древка” вец го леґинє и зрубали после чого предлужене друженє на коктелу.

ПОВЯЗАНИ ТЕКСТИ