ШИД – У Руским доме всоботу отримана порядна Рочна скупштина КПД „Дюра Киш“ на хторей принєшени вецей значни одлуки за роботу спомнутого Дружтва.
Скупштина вигласала Звит о роботи Дружтва за прешли рок у хторим, у окремним Информатору хтори порихтани за Скупштину, прегялдно и зоз фотоґрафиями начишлєни шицки активносци дружтва як и звит о приходох и розходох, а тиж прилапени и Финансийни звит и звит Надпатраюцого одбору Дружтва.
Скупштина мала и виберанкови характер, а за предсидателя Скупштини дружтва ознова вибрани о. Владимир Еделински Миколка, потерашнї предсидатель Дружтва Златко Манько ознова вибрани на тоту длужносц, а за подпредсидателя вибрани Владимир Торма, хтори и пред тим бул на тей функциї.
Вибрани и седем члени Управного одбору, а Наташа Еделински Миколка вибрана за предсидательку Уметнїцкого совиту.
За почесного члена дружтва меновани др Бранислав Маукович зоз Шиду, хтори як општински функционер дал доприношенє кед будовани Руски дом и потримує роботу Дружтва, а тиж одлучене и же би членарина за тот рок виношела 500 динари.
