МУЖЛЯ – Вирни, члени Руху фоколару, ше од 13-16. юлий стретли у Марийовим городу (Марияполи), одпочинуц ше физично, а окреме духовно окрипиц през заєднїцке друженє и молитву у єдинстве.
През цали час Маряполия пейцме священїкове духовно потримовали вирних, а єден з нїх бул и керестурски парох о. Владислав Варґа. Праве з Руского Керестура було и найвецей вирних на тим стретнуцу, вецей як двацец, а наймладши мал 6 роки.
Фоколаре зоз Руского Керестура, Коцура, Суботици, Сенти, Канїжи, Ади, Молу, Бечею, Нового Саду, Панчева, Ковину, Беоґраду, Вршца, Кореновца, Зренянину и домашнї зоз Мужлї, алє и фоколаре зоз Росиї, Мадярскей и Италиї препровадзели свой час даруюци го Господу у єдинстве и заєднїцтве.
