РУСКИ КЕРЕСТУР – У орґанизациї Фодбалского клуба „Русин”, всоботу, 17. януара у Ресторану „Три Коруни” у Руским Керестуре отримани ище єден Русниов бал.
По традициї, предсидатель ФК „Русин” Желько Орос привитал госцох и зоз пригодним словом отворел традицийни 16. Русинов бал, а потим додзелєни припознаня и подзекованя.
На тогорочним Русиновим балу, за найлєпшого бавяча преглашени Деян Югик, за найгласнєйшого навияча припознанє достал Владимир Рац, потим подзекованє достал и судия Деян Надь, док подзекованє тиж пошло и до рукох Надьовим, як триґенерацийним русиновцом: Михайло Надь, Мирко Надь и Виктор Надь. Окремне подзекованє того вечара од управи клуба достал и Дамир Орсаґ за найкрасши ошмих.
Русинов бал угосцел вецей як 200 особи, цо по тераз найнащивенши бал, а за добру атмосферу и рекордну нащивеносц бул и того року задлужени „Еуро бенд” зоз Лалитю.
На балу подзелєне вецей як 400 томболи, за хтори ше постарали орґанизаторе и числени спонзоре зоз Руского Керестура и зоз околїска. Перши три главни награди були: Резорт и спа Фрушке Терме хтори подаровал „Club Cinema” зоз Кули, потим три ноцованя на Златибору подаровал Славко Ґовля – „Амбиєнт ҐС”, док треца награда була стол и два лавочки хтору подаровал ФК „Русин”. Од трох главних наградох хтори вицагнути на томболи, два остали у Руским Керестуре.
Орґанизатор 16. Русинового балу у Руским Керестуре бул ФК „Русин”.
