КРУЩИЧ – 63. Општинска смотра дзецинскей театралней творчосци „Ясна Витас-Лукич“, почала пондзелок 15. априла у Доме култури у Крущичу.
На тей смотри будзе участвовац и Драмски студио „АРТ“ Дома култури Руски Керестур, зоз представу „Побиднїки”, автора Сашу Палєнкаша, у режиї Адриани Надь Барна. Керестурци свою представу пред селектором Владимиром Надьом буду бавиц у Керестуре на стреду, 17. априла, на 11:30 годзин на Драмским мемориялу.
Смотру отворели дзеци Дома култури зоз Червинки, театра „Стеван Сремац“ зоз представу „Цукрове кральовство“, чий текст и режию подписує Зоран Радулович.
Драмска секция ОШ „Велько Влахович“ зоз Крущичу одбавела представу Александри Лукич „Принц без талу“ у режиї Миряни Баджа.
Културни центер Кула ше представел зоз представу Любивоя Ршумовича „Успана красавица“ у режиї Слободана Ноґавици, а Дзецинска драмска секция „Велимир Сандич Велько“ Дома култури Сивец зоз представу „Добри гусаре“ на текст и у режиї Милоша Милошевича Шику.
Як визначел селектор смотри Надь, резултати смотри ше будзе знац 18. априла.
Орґанизатор и домашнї смотри: Културно просвитна заєднїца општини Кула, ОШ „Велько Влахович“ и КУД „Крущич“ зоз Крущичу. Покровитель смотри Општина Кула.