Перше место пошло до Червинки

автор Д. Барна
390 Опатрене

РУСКИ КЕРЕСТУР – Ювилейни 50 ноцни турнир у малим фодбалу у Руским Керестуре закончени пияток, 1. септембра. На турниру участвовали 11 екипи у сениорскей конкуренциї, а тиж участвовали и старши пионире, 2010, 2011, и 2012. рок, дзе були два екипи, як и младши пионире, 2013, 2014, 2015. рок, и у тим возросту були тиж два екипи.

Штири екипи хтори найвецей указали на тогорочним турниру у малим фодбалу, то були: Луксор (Luxor) зоз Руского Керестура, Амбиєнт ҐС зоз Кули, Мото клуб Парадизо (МК Paradiso) зоз Вербасу и Црвенка зоз Червинки.

У змаганю за треце место медзи екипами Амбиєнт ҐС и Мото клуб Парадизо, лєпша була екипа зоз Кули, хтора зазначела побиду зоз 12:4.

У финалним змаганю пред вельочислену публику, у хторим ше стретли Луксор зоз Руского Керестура и Црвенка зоз Червинки, побиду однєсла екипа Червинки зоз резултатом 1:0. У твардим и напартим змаганю до конца, вецей щесца и змиреносци мала екипа зоз Червинки и заслужено освоєла перше место.

За найлєпшого бавяча преглашени Милош Радманович зоз Червинки, за найлєпшого ґолмана преглашени Михайло Надь зоз екипи Луксор зоз Руского Керестура, док за найлєпшого ґолґетера на турниру преглашени Деян Давидович зоз екипи Амбиєнт ҐС зоз Кули.

Наградни фонд на тогорочним ноцним турниру у малим фодбалу бул 140.000 динари за перше место, 30.000 динари за друге место и 20.000 динари за треце место.

Турнир ше бавело на терену у Старей школи, а на финални дзень уходнїца була 200 динари, понеже були рижни и богати томболи, а главна награда того вечара була бициґла, хтору подаровала МЗ Руски Керестур.

Орґанизатор ноцного турниру у малим фодбалу у Руским Керестуре бул Фодбалски клуб Русин.

ПОВЯЗАНИ ТЕКСТИ