РУСКИ КЕРЕСТУР – У орґанизациї Фодбалского клубу „Русинˮ, прешлого тижня у Руским Керестуре почал ювилейни 50. Ноцни турнир у малим фодбалу, на хторим приявени вкупно дванац екипи сениорох.
На Турниру участвую младши пионире, народзени 2013, 2014, и 2015. року, потим старши пионире, 2010, 2011, и 2012. рок, як и сениоре, хтори ше змагаю за главну награду.
Змаганя ше бави по двокружней системи, кажде з каждим по пейц змаганя у своєй ґрупи, перши штири екипи преходза директно, а остатнї два випадаю.
У ґрупи сениорох приявени 12 екипи, у ґрупи А – „Дионисˮ з Лалитю, „Амбиєнт ҐСˮ хлапци з Кули, и керестурски екипи „Керестурска паприґаˮ, „Трендˮ, „Яраш бойсˮ, „Тополї керестурскиˮ, а у ґрупи Б наступаю домашнї екипи – „Luxorˮ, „Трафика Royal Grandˮ, „Gellato посластичарницаˮ, „Без спонзораˮ , и госцуюци „Мото клуб Paradiso Врбасˮ зоз Вербасу и „Црвенкаˮ зоз Червинки.
Побиднїки достаню 140.000 динари, другопласована екипа 30.000, а трецепласована 20.000 динари.
Турнир ше отримує у Старей школи, од 19:30 наступаю младши пионире, на 20:15 старши пионире, а потим од 21 годзин перше змаганє сениорох, док од 21:45 годзин друге змаганє сениорох.
Уходнїца за одроснутих нащивительох кошта 100, за дзеци 50 динари, а кажда уходнїца участвує и у вицагованю за томболу хтору обезпечую рижни спонзоре.
Орґанизаторе предвидзую же Турнир будзе тирвац коло штернац днї, з тим же ше през викенди Турнир нє отримує.
