РУСКИ КЕРЕСТУР – Сезона обераня паприґи будзе пожнїц, пре нєпогоди хтори ше случели у юлию, а продукователє прецерпели вельку чкоду на польох од каменцу. Прето будзе пожнїц и одкуп паприґи, котра звичайно починала после манифестациї „Днї керестурскей паприґи”.
Понеже того року урожай преполовени цена годна буц висока, а поглєдованє за паприґу будзе вельке. Потераз паприґу почали оберац лєм даскельо продукователє.
Медзи першима хтори почали одкупйовац паприґу то подприємство „Изґлед”, пондзелок, 21. авґуста и, по словох Еуфемиї Чизмар, одкупюю першу класу, другу класу и микс.
Други одкупни места у Руским Керестуре хтори ище нє почали одкупйовац паприґу, або лєм на менши количества за тераз то: ЗЗ „Керестурска паприґа”, подприємство Т – ПАМ д.о.о., Маньо д.о.о. и Аґроком БК, а тиж приходзи „Дарком” д.о.о. и накупци. Як гуторя представнїки подприємствох, тото праве оберанє и одкуп паприґи почнє у першим тижню септембра.
Кед слово о цени паприґи, вона идзе за першу класу од 100 до 110 динари по кили, док цена за другу класу 45 динари, за другу класу дробнєйшу цена 42 динари по кили. Цо ше дотика микс паприґи, цена за исту од 50 до 55 динари по кили.