РУСКИ КЕРЕСТУР – Протестни сход потримовки студентом и просвитним роботнїком отримани вчера и у Руским Керестуре. Гражданє ше позберали опрез будинку Школи „Петро Кузмяк” и зоз транспарентами ше прешейтали по центер валала.
На крижней драги бул застановени транспорт на 15 минути цихосци за 15 жертви у нєщесцу на Желєзнїцкей станїци у Новим Садзе.
У протесту участвовали коло 150 гражданє, терашнї и дакедишнї просвитни роботнїки, терашнї полнолїтни штредньошколци и дакедишнї школяре, родичи и други гражданє.
Як дознаваме, у Школи Петро Кузмяк того дня просвитни роботнїки по своїм опредзелєню потримали або нє, ґенерални штрайк у держави. Найменша часц наставнїкох цалком претаргла наставу, алє цали час були у школи, єдна часц отримали скрацену наставу 30 минути, алє цали час були у учальньох, а найвекша часц поряднє отримовали годзини.
