НОВИ САД – Докторска дисертация TERMINOLOGY RELATED TO THE RAISING OF DOMESTIC ANIMALS IN THE RUTHENIAN LANGUAGE OF VOJVODINA („Терминолоґия у вязи зоз хованьом домашнїх животиньох у язику войводянских Руснацох (коґнитивно-линґвистични аспект)”) доц. др Александра Мудрого зоз Оддзелєня за русинистику Филозофского факултета у Новим Садзе публикована по анґлийски у рамикох сериї Quaderni del CERM.
Пред роком доц. др Александер Мудри достал награду Центра за виглєдованя меншинох (CERM) часц Универзитету Инсубриа у Италиї, за найлєпшу докторску дисертацию на тему у вязи зоз националнима меншинами, а тота награда ше состояла зоз публикованя його дисертациї по анґлийски.
У опису публикациї пише же циль тей кнїжки виглєдованє фраґментох руского язика хтори ше одноша на концептуализацию и катеґоризацию домашнїх животиньох. Похасновани интердисциплинарни рамик коґнитивних линґвистичних теорийох и методолоґия зоз анализу концептуалней метафори, катеґоризацию и експерименти асоцияцийох. Тота публикация одкрива прототипних припаднїкох катеґорийох домашнїх животиньох у сучасней слики швета на войводянским руским язику хтору мож реконструовац през резултати асоцияцийни експерименти.