Шпиванки „Любов виберам” и „Твой ошмих” найлєпши на 33. „Ружовей заградки”

автор И. Сабадош, фото В. Вуячич
1.2k Опатрене

НОВИ САД – Фестивал новей рускей шпиванки „Ружова заградка”, 33. по шоре, отримани внєдзелю, 5. марца у Сербским народним театре (СНП) у Новим Садзе.

Фестивал орґанизовали Руски редакциї Радио-телевизиї Войводини и Сектор музичней продукциї РТВ, з пригоднима словами отворел го о.д. ґенералного директора РТВ Йожеф Клем, а шпивачох на бини провадзели два оркестри РТВ – Вельки народни и Вельки тамбурови оркестер, як и Фестивалска вокална ґрупа, составена насампредз зоз членїцох „КУД „Жатва” зоз Коцура.

У конкуренциї 15 нових композицийох з хторима збогацена скарбнїца руских народних и забавних шпиванкох, як побиднїцки ше видвоєли два – „Любов виберам” хтору на музику Татяни Колєсар Ґвоїч, текст Мирослави Даждиу и аранжман Ервина Малини интерпретовала Танита Ходак, и „Твой ошмих” на музику и текст Агнети Тимко Мудри и арамжман Мирослава Папа, виведла Невена Станков.

Композиция „Любов виберам” достала штири награди – повелю за налєпши текст, за найлєпши аранжман, Трецу награду фахового жирия, и награду публики за найкрасшу шпиванку, а „Твой ошмих” два – за найлєпшу интерпретацию и Першу награду фахового жирия. Попри тих двох, наградзена ище и композиция „Нови дзень” на музику и текст Агнети Тимко Мудри, у аранжману Бранислава Милинковича и интерпретациї Дарини Михняк, хтора достала Другу награду фахового жирия.

ПОВЯЗАНИ ТЕКСТИ