РУСКИ КЕРЕСТУР – Фодбалере Русину, всоботу 15. априла, у 22. колу Подручней фодбалскей лиґи Зомбор, на Ярашу одбавели нєришено процив Гайдуку зоз Стапару, з резултатом 2:2 (0:2). Ґоли за Русин дали Янко Кулич и Александар Тома.
У першей половки стретнуца, зоз даскельо полушанси, госци почали водзиц зоз 2:0.
У другей часци, домашнї частейше мали лабду у ногох, а конкетнєйша акция збула ше у 51. минути кед чувар звалєл Деяна Чернока и то бул пенал за домашнїх. Сиґурни зоз 11 метерох бул Янко Кулич. Лєм о три минути млади Александар Тома, на нєсподзиванє шицких присутних, виєдначує резултат. Зоз лабду уходзи до 16 метерох, и кед шицки чекали центершут, лабду копа до празного ґолу.
Русин наступел у составе – Деян Кронич, Стефан Тома, Александар Тома, Боян Голик, Деян Будински (Александар Тома), Филип Вуйович (Милош Буквич), Деян Чернок, Янко Кулич (Никола Циврич), Оґнєн Маркович (Владан Вуйович), Лука Иличич, Андрей Малацко.
У шлїдуюцим 23. колу, фодбалере Русина госцую у Бачу дзе ше стретню зоз домашню Твердиню.