Лєто час рочних одпочивкох, а одкеди ше велї фамелиї розселєли ширцом по швеце, воно и нагода нащивиц своїх блїзких у старим краю. Так и у Руским Керестуре велї припутовали зоз швета до своїх, дзепоєдни заш отадз пошли опатриц свойо дзеци и унуки до других жемох дзе жию. Єдна з тих цо пришла до своїх и Марияна Будинскова, котра зоз свою фамелию жиє у Кичинеру у Канади
Марияна пришла опатриц родичох, шестру, баби и дїда, другу родзину. Окремне радосни були баба и дїдо Надьово, т.є. Митьово, у валалє познати яґ Ґатерово, бо означую и 65-рочнїцу малженского живота. Унуков приход була нагода же би коло себе позберали цалу свою фамелию.
ПРИШЛИ ШЕ НАБУЦ ЗОЗ СВОЇМА
Марияна або Мая, теди Фа, до Канади пошла 2010. року, и у медзичаше ше єй вельо послучовало. Надумала там остац з леґиньом Борисом Будинсковим и його родичами, котри ше пред тим виселєли з Руского Керестура. Чекали скоро рок на папери, побрали ше, а вец ше млада Мая предлужела поряднє школовац, бо так научела язик и швидко нашла и студентску роботу, цо єй ище баржей помогло звладац анґлийски язик. Закончела Коледж за социялного роботнїка за особи з окремнима потребами, и тераз роби зоз старшима. У медзичаше Мая постала мама, 2015. року ше народзел син Патрик, а 2021. и Матей.
– Плановали зме скорей присц, були зме пред шейсцома роками з Патриком, а вец ше народзел Матей, бул Ковид, та так випадло. Надумали зме присц на длугши час, на лєтни одпочивок, перше, же би ше дзеци упознали з братняками и дружели и, вшелїяк, видзиц моїх родичох, супругову Бруґошову бабу, и моїх Митьових бабу и дїда. Пообиходзели зме шицких, и уж будзе два мешаци як зме ту, я зоз хлапцами, а супруг Борис могол лєм на кратко присц и то так же нас нєсподзивал, бо нє було плановане. Наисце зме вихасновали тот одпочивок, та думам же шицким останє у красним паметаню – дознаваме од Маї коло котрей заскакує младши Матей и випитує ше єй койцо по руски. На питанє чи так з хлапцами бешедую Мая гвари: – Патрик будзе мац 9 роки, и вон вчас почал ходзиц до оводи, анї рок нє мал, и вельо мушел там оставац бо зме ше шицки ище дошколовйовали. Прето и нє ма тоту руску основу як Матей, котри попри Патрика, звладал уж и по анґлийски. Но, Патрик ше ту барз добре знашол, ту є з братняками Тонийом и зоз старшим Мартином, и вони ше добре складаю. Приповедаю по руски, Патрик ше намага, а и вони знаю досц по анґлийски и позгваряю ше – толкує Мая, и далєй предлужує.
– Кед зме пришли, шестрового сина Тония зме одвезли на Яраш на тренинґ, и чекали зме го у тети Олї, бо бива блїзко при Ярашу. Анї зме нє обачели як ше Патрик сам нашол на тренинґу и уписал ше до екипи Русинових пионирох, а нє знам анї сама як то покончел. И до конца и вон ходзел на тренинґи, тераз бавел и на турниру, дал и ґол, та бул барз щешлїви. Барз є знаходлїви, пачи ше му и же ту на валалє дакус шлєбоднєйше. Одушевени є ту и пре братнякох же ше кажди дзень бавя, купаю, и на морю вєдно були…
Опитали зме ше Марияни и цо єй значело же мала нагоди вецей як два мешаци ше набуц у родзеним краю, зоз свою найблїзшу фамелию, стретнуц и других познатих…
– Mнє барз вельо значи. Уж сом поцерпала остатнї роки же чи ме шицки дочекаю, а барз сом сцела най видза и Мартина. Мило ми же ше вон зоз дїдом Любом и бабу Єлку бави, вожели ше на древеним кочику цо справел мой дїдо Михал. И им ше барз здало, вєдно правели койцо, бо дїдо ище люби майстровац, та уживали. Зняла сом шицко най му баржей останє у памятки, бо є тераз ище мали. Патрик сиґурно шицко будзе длуго паметац бо є старши. Барз нам значи же зме могли присц и остац зоз шицкима ше постретац, ту, у Керестуре. З моря зме зашли и до Краґуєвцу до моєй тети, оцовей шестри, най видза дзе ми ходзели служиц, нащивели зме и Шумарици, и, поготов, Патрикови було барз интересантне цо ше там случовало. Врацаме ше 24. авґуста, з полним шерцом и вельо краснима памятками – заключує Марияна.
ВЄДНО ШЕЙСЦ И ПОЛ ДЕЦЕНИЇ
Тото лєто Митьовей одн. Ґалусковей, Рацпетийовей и Пашовей фамелиї останє у наисце барз красним паметаню, бо ше могли длуго набуц зоз Маю и єй синами.
Окреме ше радовали прабаба Будинскова же видзела праунука, як и прабаба Мария и прадїдо Михайло Надьово, т.є. Митьово, же дожили видзиц и наймлашого праунука. Ґу тому вони того року означую 65 роки як себе пришагали и ступели до малженства. Мария нам гвари:
– Барз зме задовольни же зме ище тото штварте праунуче видзели. Маме тераз штверо унучата – Сашку и Маю, їх супругох Кима и Бориса, и унукох Владка и Мижа, дзивки Єлку и Оленку, жецох Любу Ґалускового и Владу Рацпетийового, и штирох праунукох Мартина и Тония, Патрика и Матея.
Остарели зме уж барз, мнє 82, а мойому будзе 87 роки, алє зме тераз барз задовольни, же зме витримали вєдно 65 роки – зверела нам Мария.
ПРИСЛОВКА ШЕ ОБРАЦЕЛА
Здравє єй уж досц ослабело, но ище вше ходзи зоз кочиком, основне пороби, а як гвари, супруг єй барз вельо помага, и попораїц и понабавяц цо треба, бо його ноги ище добре служа.
– Гей, я у франти гварим же у нас ше тераз обрацела присловка же жена трима у обисцу три кути, а хлоп єден. Нє чежко ми кед видзим же моя нє може, та дзечнє помагам – надовязує ше Михал, котри як гвари, давно заменєл авто з бициґлу, а и дзечнє ше шейта, поготов, вечарами. Вон и дакедишнї колєсар, котри себе ище вше найдзе роботи у своїм мигелю, дзе и нєшка стоя його машини, и материялу ище єст, груби стебла док робел на своєй ґатернї.
– Любим робиц, гоч дахто гвари яка правда, алє ми таки длуги дзень кед нє робим. Любим пойсц ґу своїм машином и мам нєзакончени кочики, та до нїх длобем, и вше дацо найдзем. Набавел сом нєдавно и три овци най место мнє „покоша”.
И мойо шерцо полне, барз зме чекали Маю, и Слава Богу же зме видзели и праунучата и вчера зме ше цали дзень бавели. Тот младши барз живи аж на шопу по драбини ше випендрал, робел зо мну, гвозди забивал, з машинку вартал… Мило ми же зме дочекали и 65 роки малженства, цо нє таке часте нєшка – закончує Михал, а обидвойо надпоминаю же за длуги и красни заєднїцки живот найважнєйше знац пребачиц, нє допущиц гнїву же би тирвал длужей як 15 минути. Гоч ше дакеди и нє розумя, або ше випове и даяки чежши слова, цо ше женом найчастейше случує, хлоп треба най ше прави же нє чул… и предлужиц далєй. З тей нагоди и ми им винчуєме, на многая и благая лїта!
