КОЦУР – У Велькей сали Дома култури у Коцуре всоботу вечар 1. фебруара, з нагоди означованя Дня Святого Сави КУД „Завичайне врело” отримало XII Святосавски концерт.
Тот традицийни концерт почал зоз Святосавску гимну, а присутна публика могла чуц и пригодну бешеду о живоце Святого Сави, о його подоби, як и о значносци його дїла за сербску православну церкву, литературу и образованє у Сербиї.
Присутних привитал предсидатель општини Вербас Милан Ґлушац и визначел значносц роботи КУД „Завичайне врело” и отримованя таких подїйох за културу и єй очуванє. Пар слова присутним гварел и протоєрей Илия Зеканович, а спред Дружтва шицких поздравел його предсидатель Томислав Бомештер и подзелєл подзекованя тим котри помогли їх роботу, як и концерт. Тиж, спред Дружтва присутних привитали и Янко Кулич и Славко Вулин, и з тей нагоди окреме подзековали Општини Вербас, Месней заєднїци Коцур, Туристичней орґанизациї општини Вербас, и другим.
Того вечара ше представели члени Културно-уметнїцкого дружтва „Сербия” зоз Кули, Фолклорни ансамбл Културного центру Вербас, як и домашнї зоз Културно-уметнїцкого дружтва „Завичайне врело”. На сцени ше зменьовали танєчни точки зоз провадзеньом оркестра, числени рецитациї и шпиванки. Кажда точка танечнїкох, шпивачох и рецитаторох була наградзена з гласним аплаузом.
По законченей програми, домашнї и орґанизаторе зоз КУД „Завичайне врело”, вєдно зоз шицкима госцами у учашнїками предлужели друженє у Пелетовей сали.
