НОВИ САД – Тирва студийне знїманє вокалох за 16 вибрани шпиванки за тогорочни Фестивал новей рускей шпиванки „Ружова заградка 2025”, котри будзе отримани 16. марца у Сербским народним театре у Новим Садзе у орґанизациї Радио-телевизиї Войводини.
У музичним студию на Мишелуку Радио-телевизиї Войводини, тих дньох ше знїма шпиванки котри буду виведзени на фестивалу.
Композициї ше знїма и архивує у Радио Новим Садзе и на таки способ ше збогацує нашу руску музичну скарбнїцу у хторей уж по тераз зачуване блїзко 500 композициї.
На бини у Сербским народним театре, шпивачох буду провадзиц Вельки народни и Вельки тамбурови оркестер Радио-телевизиї Войводини.
Ревиялна часц Фестивалу будзе пошвецена Йовґенови Надьови котри того року означує 50 роки своєй шпивацкей кариєри.
Фестивал новей рускей шпиванки „Ружова заградка” як и потерашнїх рокох, годно директно провадзиц на Трецей програми радия на 92, 100 и 107,1 меґагерци, на Другей програми Радио-телевизиї Войводини, як и прейґ интернету.
