У Керестуре нєшка – Отверанє Святих дзверох Святого року

автор Ол. Папуґа
60 Опатрене

РУСКИ КЕРЕСТУР – У нашей Епархиї святого Николая Ювилейни дзвери буду шветочно отворени нєшка, 11. януара на 10 годзин, зоз обрядом отвераня дзверох и Службу Божу, у катедралней церкви святого отца Миколая у Руским Керестуре и у церкви у Марийовим святилїщу у Водици.

Як нам уж познате, святиши отец Франциск 24. децембра 2024. року шветочно отворел Святи ювилейни рок. Ювилейни рок преглашени на тему „паломнїки надїї” и будзе тирвац по 6. януар 2026. року.

Єден з препознатлївих знакох Ювилейного року то отверанє „Святих дзверох” або „Дзверох милосердия”, у катедралох и одредзених церквох ширцом швета. Тоти дзвери символизую Христа, котри „дзвери през котри ше уходзи до живота” (Йо.10, 9). Отверанє дзверох означує Божу порихтаносц же би приял каждого хто ше покає и приступи його милосердию.

Ключни елемент Святого року то паломнїцтво, нє лєм физичне паломнїцтво до храмох, алє и духовне путешествиє, котре помага обновеню вири, глєданю смисла живота и оздравеню души. Важна часц паломнїцтва то можлївосц присупиц до святей тайни покаяня, як символ глїбокого духовного навраценя.

На уровною нашей Епархиї ше орґанизує пломнїцтво до Риму и Барию у Святим ювилейним року од 18. по 25. май. Орґанизатор паломнїцтва о. мр. Дарко Рац, канцелар Епархиї. Цена аранжману 800 евра.

ПОВЯЗАНИ ТЕКСТИ