НОВИ САД – Предостатнє тогорочне число новинох „Руске слово” у рубрики Тижньовнїк пише о схадзки Министерства образованя зоз представнїками националних меншинох, а на тему образованя националних меншинох, док на Наших местох звит зоз роботнї за наставнїкох о медийскей писменосци, зоз додзельованя наградох коцурским школяром на конкурсу Явней библиотеки у Вербаше и зоз роботнї о крохмалєню котре орґанизовало Здруженє гражданох „Руска скарбнїца”.
Економия у розгварки зоз Мирославом Канюховим зоз Дюрдьова дознава о стану у статкарстве и пише о проєкту „Мали бизнис за вельку фамелию”.
Боки Култури и просвити зазначели святочну атмосферу на Крачунским концерту Дома култури Руски Керестур, приноша вистки о активносцох Руснацох у Републики Горватскей, як и вистку о отриманих 34. Дньох Миколи М. Кочиша у Новим Садзе. Ту обявена и информация о друкованю Руского християнского календара за 2025. рок.
Рубрика Людзе, роки, живот свойо боки пошвецела Славкови Цуперови зоз Шиду, а Духовни живот децемберским шветом – означованю швета Миколая у Беоґрадзе, Крачунским вашаре у Руским Керестуре и акциї „Дунц-шпайз” у Коцуре.
Спорт дава прегляд єшеньскей полусезони у наших фодбалских клубох и огляднуце на потерашнї змаганя на Жимским турниру у фодбалу.
Горуци тепши предкладаю рецепти даскелїх крачунских колачикох, додаток Руске словечко представел перспективну ґимнастичарку Ирину Бики зоз Нового Саду, а Дом и фамелия свойо боки пошвецела колядованю.
У тим чишлє нашим читачом даруєме мурови календар за 2025. рок.
