У знаку колядох, шпиванкох и танцох

автор Вл. Дїтко
158 Опатрене

БИКИЧ – З нагоди националного швета Руснацох вчера, 16. януара у сали Дома култури отримана пригодна програма хтору порихтали КПД „Иван Котляревски“ и Подручна канцелария Националного совиту Руснацох у тим валалє.

После державней гимни „Боже правде“ и шветочней шпиванки „Браца Русини“, професор Зденко Лазор укратко винєсол хронолоґию историйних збуваньох о насельованю Руснацох на тоти простори окреме до Сриму.

Госцох спред орґанизатора привитал предсидатель КПД „Иван Котляревски“ Деян Бобаль, програму предлужели наймладши зоз дзецинскей танєчно-шпивацкей ґрупи зоз колядами и рецитациями.

Шицких присутних поздравел и повинчовал швето Славиша Сабадош, предсидатель Вивершного одбору Националного совиту Руснацох (НСР), а наступела и шпивацка ґрупа „Бикичанки“ зоз колядами.

У предлуженю Деян Бобаль гуторел писню Михайла Ковача „Баба Горнячка“, а зоз краснима поетскима стихами зоз своєй писнї „Мойо гори“ наступел и професор Зденко Лазор.

На концу програми ознова наступели наймладши зоз дзецинскима бависками зоз Горнїци и шпиванку у „Градочки шалата“ з музичним провадзеньом на гармоники Мирослава Майхера, уметнїцка руководителька Любов Зейкан Бобаль.

Програму провадзели помоцнїца предсидателя општини Шид Єлена Шушкич, предсидатель Вивершного одбору НСР Славиша Сабадош, член НСР Михайло Пашо, нашо паноцове о. Михайло Режак и о. Владимир Еделински Миколка, представнїки КПД „Дюра Киш“ зоз Шиду, КПД „Драґутин Драґен Колєсар“ зоз Бачинцох, СКУД „Єднота“ зоз Шиду и други.

ПОВЯЗАНИ ТЕКСТИ