КИЄВ̸УКРАЇНА – Венециянска комисия, совитодавне цело Совиту Европи, до конца мая ма анализовац українски Закон о националних меншинох, хтори Верховна рада, парламент України прилапел 13. децембра 2022. року.
Комитет парламентарней скупштини Ради Европи 30. януара дал Венециянскей комисиї обовязку же би порихтала анализу закона о меншинох, хтори єден од седем законох хтори Україна ма усоглашиц зоз европску леґислативу за предпиступ до ЕУ, понеже ше пред приношеньом того закона нє консултовала зоз Венециянску комисию, т.є. зоз Европску унию. Анализа ма буц готова по пленарне зашеданє Европскей комисиї хторе будзе отримане 9. и 10. юния 2023. року.
Венециянска комисия совитодавне цело Ради Европи, а формоване є пре даванє совитох и правней помоци державом хтори сцу досягнуц европски стандарди у обласци демократиї, людских и меншинских правох. Русином у України остава наздаванє же держава у хторей жию припозна их национални идентитет и право на хаснованє русинского язика.