РУСКИ КЕРЕСТУР – Новинарска асоцияция Руснацох (НАР) з нагоди крачунских шветох у велькей виронаучней сали у Руским Керестуре, 27. децембра пририхтала виставу фотоґрафийох иконох котри намальовал маляр Арсениє Теодорович, и фотоґрафиї на котрих деталї иконостасох древорезбара Арсения Марковича.
Присутних на вистави привитал керестурски парох о. Владислав Варґа, а виставу отворела Ирина Гарди Ковачевич и Єлена Перкович. Вони поинформовали о значносци того проєкту котри тирвал два роки. Резултат того проєкту, потолковали, тота вистава котру годни видзиц и заинтересовани у Коцуре.
Як визначела Перковичова, о тим пренаходку треба обвисциц Руску заєднїцу, бо на иконостасох у Катедралней церкви св. Микола у Руским Керестуре, и прокатедралней церкви Успения Пресвятей Богородици у Коцуре, Руснаци маю вельке благо. Икони и иконостаси двох Арсенийох пренайдзени и у Републики Горватскей, у церкви Пресвятого Тройства у Крижевцох и у церкви св. Георгия у Стойдраґи.
У кнїжки, котра нєодлуга будзе и видрукована, а у котрей о своїх пренаходкох пишу два кустоскинї, специялизовани за сербску подобову уметносц 18 вику, Драґойла Живанов и Милена Врбашки, указане на значносц творчосци Арсения Теодоровича и Арсения Марковича.
