КУЛА – На порядней дзеветнастей схадзки Скупштини општини Кула котра була отримана стреду 18. децембра, прилапени општински буджет за наступни 2025. рок, алє принєшени и велї значни одлуки понеже ше на седемгодзиновим зашеданю розправяло аж о 27 точкох дньового шора.
Кед слово о Руским Керестуре, на место о. д. директора ЯКП Руском меновани Владимир Олеяр, понеже потерашня директорка Биляна Ковачевич задзековала на тоту функцию. Олеяр скорей того задзековал на функцию члена Општинскей ради, дзе го одменї Ґабриєла Саянкович.
Скупштина принєсла и одлуку о розписоваю конкурса за место директора Дома култури Руски Керестур, понеже терашньому директорови мандат тирва до марца.
На початку зашеданя, розправяло ше о зменьованю заменїка предсидателя СО Кула Михайла Пашу. Предклад о його розришеню подписали и обгрунтовали 13 одборнїки опозициї, алє є нє прилапени по резултатох тайного гласаня. Присутни були 30 од 37 одборнїкох, лєм 10 гласали, спомедзи котрих 9 за, а єден глас бул нєважаци. 28 одборнїки анї нє гласали. Тота точка єдина котра нє прилапенa.
Медзи иншим прилапени шицки други точки дньового шора – Кадрови план Општинскей управи Кула, Одлука о локалних административних таксох, Одлуку о надополнєньох за хаснованє явних поверхносцох, вименки Одлуки о локалних комуналних таксох, та Одлука о локалним плану управяня зоз шмецом.
Кед слово о општинским маєтку, принєшенa одлука о предаваню двох општинских нєрухомосцох, и одлука о предаваню трох будовательних поверхносцох. Потим Општина превжала маєток дакедишнєй школи на Новей Кули, чий хаснователь була ОШ Петефи бриґада.
Прлапена и Одлука о розписованю конкурса за директора ЯКП Комуналєц Кула.
На дньовим шоре були и даскельо точки о финансийней потримовки фамелийом зоз дзецми, алє и о статусним розришеню родитель-неґователь.
Прилапени и програми дїлованя явних комуналних подприємствох, установох котрим општина снователь – Спортски центер, Туристична орґанизация и Центер за социялну роботу, та и звит за прешли и план за чечуци школски рок ПУ Бамби.
