РУСКИ КЕРЕСТУР – У Велькей сали Дома култури вчера вечар отримани Концерт з нагоди законченя школского року школярох видзелєного рускокерестурского оддзелєня Школи за основне музичне образованє (ШОМО) з Кули.
Концерт oтворел Хор нїзших класох музичней школи котри одшпивал два шпиванки, а потим як солисти наступел трицецєден школяр од першей по шесту класу на инструментох на хторих ше уча грац, а то клавир, тамбура прим и тамбура басприм и гармоника.
Медзи нїма були и пецеро школяре котри того року посцигли успих на вецей змаганьох а то Кристина Гарвильчак, перша класа клавир, Теодор Гарвильчак друга класа гармоника, Даниел Фейди перша класа тамбура басприм, Иван Фейди пията класа тамбура басприм, та Иван Планчак, шеста класа тамбура басприм. На Концерту найуспишнєйших школярох ШОМО у Кули, 7. юния, Иван Планчак достал и припознанє Школяр ґенерациї у тей школи.
На концу ше представел и Оркестер музичней школи оддзелєня у Руским Керестуре, на тот завод тамбураше котрих провадзел на клавире наставнїк Мирко Преґун. Школярох попри нього пририхтали наставнїки Геленка Гарвильчак, Мирон Сивч и Ладислав Тамаши, а клавирски сотруднїк на концерту була Кая Мандич Плавшич.
