Жена

автор а. бучко 4. септембер 2022

Чом ходзиш така? Допатрай ше дакус. Опать лєм кельо ши шминки натрепала на себе.

Яка ши худа, хора ши?  Опать яка є дебела, сиґурно є нєзадовольна. Дома є з дзецми, сиґурно є нєвипольнєта. Бежи за кариєру, а дзеци дома, себична є.  Нє ма дзеци, вона нєподполна.

Будз женственша. Провокуєш же биш була силована. Нолє, поприберай ше дакус. Ходзиш наквацкана. Наляпкала ши шминку. О, Боже, хора ши? Полож дакус маскари и руменила.

Остала з нїм у малженстве, а анї го нє люби. Розбила фамелию. Винервирала ше и подзвигла глас – гистерична є. Гварела асертивно цо дума – ароґнатна є. Гварела ци же ше нє склада з тобу – одкадз єй право?

Жада мац вецей – нє ценї цо ма. Зна кельо вредзи, пита векшу плацу и напредованє – випина ше. Приявела насилство – видумує. Нє приявела такой насилство – чом нє приявела?

Остал єй брух од ґравидносци – опать як нє меркує на себе. Дзецко єй хоре и оцец з нїм – яка то мац? Одпутовала на роботни викенд и охабела дзецко з оцом, бабу, дїдом – яка то мац? Остала сама у квартелю поробиц дацо за себе, а супруг зоз дзеком – яка є себична.

Ходзи на психотерапию – зоз ню цошка нє ушоре. Ходзи по плажи без горнєй часци купацого костиму –  яка лудача, одкуд єй право? Ходзи нєобритвена – фуй, ґадзи ми ше. Нє вифризирана є – яка є алькава.

Кельо дзеци ма  Борис Джонсон (бувши премиєр Велькей Британиї) зоз келїма женами? И чом Доналд Трамп виплацел вельку суму пенєжу порноґрафскей гвизди же би нє гварела же мали секс и кого шицко вец ище сплацел най будзе цихо?

Дупли стандарди у хторих одрастаме и хтори нам з воспитаньом надрилєни нательо же анї нє похопюєме же су ту. И шицко цо Мирослав Задрепко гварел у прешлим чишлє (ч. 34, 26.8.2022.), най ше нє повторюєме.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 102 раз, нєшка 1)