РУСКИ КЕРЕСТУР – Интернационална ґолманка у женским рукомету Злата Паплацко нашла свойо место у кнїжки „Жени и рукомет, 70 роки историї Шпаниї” автора Миґела Ангела Марсия Лина, обявела Паплацкова на своїм Фейсбук боку.
Злата Паплацко народзена у Руским Керестуре, рукомет почала тренирац у керестурским рукометним клубе „Русин” ище кед єй було 12 роки. Потим шлїдзели клуби у хторих Злата успишно бавела рукомет на месце ґолмана и постала репрезентативка, а у историї рукомета у Шпаниї охабела шлїда кед одбавела сезону зa Валенсию у Шпаниї, у сезони 1999-2000, и зоз тимом освоєла три трофеї: лиґу, Куп Кралїци и Куп победнїка купох 2000.
Автор Миґел Ангел Марсия Лин, новинар зоз Валенсиї у Шпаниї, у кнїжки „Жени и рукомет, 70 роки историї Шпаниї” представел пейдзешат шпански бавячки женского рукомету, алє и коло сто бавячки зоз других державох хтори збогацели историю рукомету у Шпаниї.