Вшадзи уткал и часц себе

автор тах 11. септембер 2016

Нєт того хто у Коцуре нє позна Александра, Сашу Суботина. Познати є по тим же ше безрезервно заклада за лєпши стан ромскей заєднїци, и же помага шицким тим хторим помоц барз потребна. Чежке дзецинство и худоба, наведли пастора же би на своєй животней драги поглєдал духовну и материялну охрану.

Александар Суботин у Коцуре жиє зоз супругу и двоїма дзецми, у красним, скромним обисцу, хторе з векшей часци  служи и за богослуженя Євангелскей церкви у Коцуре. Вон источасно лаицки пастор тей церкви хтора зазберує коло сто парохиянох, ромскей, алє и других националносцох.  Попри церкви,  зоз гуманитарну роботу ше занїма од младосци, так же познати слова: гладного накармиц, смиядного напоїц, худобного облєчиц, а хорого нащивиц – слова хтори, як вон гвари, основа и його дїлованя алє и порушуюца моц.

Сашу нє гласкал живот, та озда прето и помага другим.

– Нє мал сом щешлїве дзецинство, як цо мали други дзеци, и вчас сом скоштовал биду. Нє мал сом анї 11 роки, а уж сом навелько робел на полю, и роками служел зоз дїдом у Кирила Пляскача у нашей улїци. Од Кирила сом вельо научел, вон ми бул як други оцец, упатрал сом ше на ньго. Нє мал сом нагоду ходзиц до стреднєй школи, та сом свой час препровадзовал у церкви – гвари Саша, а потим потолковал же одкаль така повязаносц зоз церкву и зоз Богом.

– Одроснул сом з бабу и дїдом, бо ми ше родичи розишли. Моя шестра жила у оца, та зме ше часто нє стретали, гоч зме були єдно на друге навязани. У церкви ми гварели же лєм най ше модлїм и верим же ше дацо случи. Я у молитвох жадал ознова  буц зоз мою шестру, и обецал самому себе же кед ше тота молитва зисци,  будзем служиц и помагац цали свой живот. Так и було. Моя шестра вше частейше могла присц до мнє, и я до нєй, мали зме нагоду зблїжиц ше. Теди сом пошол до церкви, одлучни же будзем помагац тому кому то потребне – гвари Александар.

ТЕРАЗ УЖ ВИДНО РЕЗУЛТАТИ

Кед пред вецей як дзешец роками починал з гуманитарну роботу, Александар нє мал вельо цо понукнуц людзом у потреби. Зоз супругу Даниелу мали ринґишпил з хторим ходзели по вашарох. Уж теди, од того дакус цо зарабяли, видвойовали часц за худобних.

– Мали зме малу трамболину, и конїки. Нє раз зме заробене дали худобним. Часто ґу нам приходзели ромски дзеци вожиц ше, а нє мали пенєжи, та ше лєм припатрали на конїки. Жаль нам було, та зме их пущали най ше вожа задармо. Вецей раз зме мали щесца, и зарабяли вецей як тоти цо мали вельки ринґишпили. Нїґда нє забудзем кед сом єдного рана на вашаре у Пиньвиц остатнї динар дал старей и хорей жени най ше нає. Паметам же зме того пополадня барз вельо заробели, и я бул прешвечени же то нє случайно – гвари Саша.

Материялни стан и едукация ромскей заєднїци у валалє пред двацец, двацец пейц роками була досц подла, а найвекши проблем Ромох у валалє було нє прилапйованє особного националного идентитету. Тот проблем их и нєшка мучи. Роми нє сцели буц Роми. Саша видзел же муши цошка зробиц.

– Бул сом на велїх семинарох и учел о тим як треба робиц зоз Ромами и як их повязац зоз церкву. Там ше моя жажда за служеньом ещи баржей „розбовчала”. Думам же прето Бог благословел мою роботу, на концу, и мой живот. Тото прецо ше цешим то факт же кед сом починал свою „мисию”, ромски  дзеци нє барз ходзели до штреднїх школох, та анї основну школу велї нє закончели. Нєшка цалком иншак, и скоро шицки дзеци у основней школи. Од кеди робим зоз Ромами, маме вецей як 50 особи закончели вечаршу школу, и здобули основне образованє – задовольни Суботин.

24 zoz volonterami

ПОТРИМОВКА ЗОЗ ИНОЖЕМСТВА

Попри гуманитарней орґанизациї Табита, хтора му на самим початку вельо помогла, и рижних других орґанизацийох ширцом швета, Саша цалком случайно ступел до контакту зоз волонтерами зоз Голандиї, хтори вельо помогли ромскей заєднїци у Коцуре, алє и велїм другим.

– На семинару у Фекетичу сом упознал єдного пастора хтори ме упознал зоз Рию Вонсбехер, хтору нєшка любим як власну мацер.  Вельо ми помогла. Ступели зме до контакту зоз волонтерами зоз городу Лирдам, хтори у Коцуре барз вельо поробели. Жадали вибудовац вельку церкву, алє я бул задовольни з малу церквочку у хторей зме нєшка, а остаток пенєжу сом предложел же би ше подзелєло худобним. Од теди, по нєшка, до Коцура сцигли камиони полни з облєчивом, опрему за школи и шпиталї, єдзеня, а на даскельо заводи волонтере з Голандиї у Коцуре мали роботни акциї. Нєпреривно сотрудзуєме и дзень-нєшка, а Голяндянє маю ещи вельо плани за нас – гвари Саша.

На Євангелску церкву у Коцуре ше дакеди подозриво патрело, окреме дзеведзешатих рокох прешлого вику. Нєшка то нє так, а вельки заслуги за тото ма Саша Суботин.

– То и велька одвичательносц. Я ше любим старац о дзецох, у нїх  якош и себе видзим, и нє сцем же би нє мали дзецинство. Им потребна любов, хтошка хто их будзе розумиц и помагац им, унапрямовац их. А кед слово о одроснутих, ту єст и тих хтори розчаровани.  Я верим же кажде хто сце буц християн, мушиш пременїц свой способ живота. Нє може жиц у бруду, запущени, муши ушориц свойо околїско, и буц достойни чловек, а велїм ше то нє пачи – гвари Саша.

Лєм гарсточка людзох зна же, окрем фамелийом, Саша помогол и велїм установом у Коцуре, у тим цо им було потребне. Вон гвари же тота його помоц, и помоц людзох хтори тиж помогли, будзе велька потримовка, мотивация людзом же би нє стали у месце, алє крочели далєй.

МАМ ПОТРИМОВКУ

Саша толкує же гуманитарна робота нє лєгка и чловек ше єй муши подполно пошвециц.

– Случело ше же сом уж сцел и охабиц шицко тото цо робим, окреме пре здравствени проблеми, алє и прето же сом уж покус вистал. А вец ше случи же ше зявя даяки проєкти на хторих сом одвше сцел робиц, и я ознова достанєм моци влапиц ше до нїх. Вельку потримовку мам и од своєй фамелиї, и гоч сом мал нагоду пойсц до иножемства робиц зоз Ромами, моя фамелия и я на таке ещи нє порихтани – гвари Саша.

24 druzenje za dzeci u jevanhelskej cerkvi

(Опатрене 334 раз, нєшка 1)