БЕОҐРАД – Представнїки Националного совиту рускей националней меншини предсидатель Стеван Самочета, и член Роботного цела за науку др Владимир Чакан початком септембра були на схадзки у Русийскей амбасади дзе их прияли: министер совитнїк Алексей Семенихин, перши секретар амбасади Андрей Буравов. На схадзки бешедоване о култури, образованю и науки.
Як потолковал предсидатель НСРНМ Стеван Самочета, кед слово о култури Руснацох, представителє Националного совиту рускей националней меншини були нєсподзивани же у Русийскей амбасади знаю вельо о Руснацох, як у Сербиї так и у швеце. Русийска федерация нє ма дилеми коло припознаваня Руснацох як окремного народа. У Амбасади виражели отвореносц за сотруднїцтво зоз Националним совитом рускей националней меншини и предложел даскельо конкретни активносци. Єдна зоз заєднїцких активносцох ше одноши и на орґaнизованє трибинох и округлих столох хтори буду пошвецени рускей националней заєднїци у Сербиї и заєднїцким контактом припаднїкох рускей и русийскей националней меншини.
Бешедоване и о виучованю руского язика у Беоґраду. Визначени и податок же нєшка у руским оддзєлєню першей класи Основней школи „Братство єдинство” у Коцуре єст пецерих школярох а двойо и припаднїки русийскей националней заєднїци у Сербиї.
– У Русийским доме бешедоване коло обезпечованя простора за виучованє руского язика зоз елементами националней култури у Беоґрадзе у хторей би ше отримовали годзини у термину хтори будзе одвитовац родичом школярох. Кед же будзе заинтересованих за виучованє руского язика зоз елементами националней култури, Русийски дом порихтани прияц делеґацию националного совиту на дальшу розгварку. Двоме науковци зоз иножемства докторовали на тему руски язик а на русийским язику. Перши бул Александер Д. Дуличенко, хтори руски язик уведол до славистики. Наслов його кандидатскей дисертациї Литературни руски язик Югославиї – фонетика и морфолоґия. Други науковец то Вячеслав Чарски, хтори хвильково заняти у Русийским доме як заменїк директора. Наслов його дисертациї Руски язик Сербиї и Горватскей у швеце язичних контактох: линґвоґенетични аспект. Резултати до хторих дошол Чарски нательо прешвечлїви и очиглядни же будуци виглєдованя на тоту тему можу дзепоєдни податки лєм прецизовац або додац одредзене число нових прикладох, алє резултати науково фундираней студиї ше сущно вшелїяк нє пременя. На схадзки порадзене и же би ше докторска дисертация Вячеслава Чарского преложела на руски язик – визначел Самочета.