РУСКИ КЕРЕСТУР – Ище єдна осма Подобова колония Еуфемия Гарди, отримана за конєц лєта, всоботу 19. септембра, у орґанизациї Месного одбору Рускей матки, у Руским Керестуре.
Понеже ше отримованє Подобовей колониї на отвореним влонї указало як добра пракса, орґанизаторе и того року одлучели на истих трох локацийох угосциц подобових творительох аматерох – на базену, у обєкту рибарского здруженя, и у Водици. З тей нагоди Колония позберала дванацецерих учашнїкох, рижних ґенерацийох, шицки були зоз Руского Керестура, а свойо креативни идеї на платно пожадали пренєсц на отвореним, у природним амбиєнту.
Гоч на дзень Колониї нє шицки могли присц, окреме госци зоз других местох, шицки учашнїки свойо готови роботи на шлєбодну тему длужни придац орґанизатором по 19. новембер, кед роботи буду дати на виробок за каталоґ, а потим и виложени на двох виставох – у Новим Садзе, з нагоди означованя Дня рускей култури, а потим и у Руским Керестуре, на дзень Рускей матки.
Колонию провадзели проф. др Михайло Фейса спред Рускей матки и фахови руководитель Колониї Славко Пап.
