Жовте зарно добре зродзело

автор влдї, фото тах 21. октобер 2016

Парасти у шидскей општини хасновали вигодну хвилю же би поробели цо вецей, а найактуалнєйши були шатва жита и ламачка кукурици. По урядових податкох општинскей Канцелариї за польопривреду, плановане же би ше тей єшєнї зоз житом пошало 5 430 гектари.

Од планованих поверхносцох найвецей жита будзе на польох парастох и то 5 050 гектари, а на польох польопривредних подприємствох и задруґох 380 гектари. Предвидзени и 120 гектари жимского ярцу, а олєйова цвиклочка пошата на 165 гектарох.

Никола Стоєцки

Никола Стоєцки

Кукурици було на 15 772 гектарох, тогорочни урожай добри, просеково 6,9 тони по гектаре, а влага медзи 15 и 21 одсто.

Зоз 1,5 гольта кукурицу виламал и Никола Стоєцки зоз Шиду и на спомнутей поверхносци достал 12 тони урожаю, и прето є барз задовольни.

– Чутка квалитетна и длугока, влага коло 18 одсто, а урожай би бул и векши да єдну часц з поля нє однєсли крадоше – гвари Никола. – Кед шицко поздавам, остава и заробок. Уложени 55 000 динари, з тим же цена кукурици у чутки того року лєпша як предходних рокох. Штредком октобра була 12 еври за 100 килограми, а скорей коло осем еври.

Жем сом добре порихтал пред шатву и руцел сом штучного гною НПК „6-24-16” 150 килограми, потим тиж тельо „уреи” и „КАН”. Два раз сом и пирскал процив коровча и раз опарал. Ламачка кошта 6 000 динари по гольту, алє заробок будзе – твердзел Стоєцки. На яр вон планує пошац сою, гоч влонї з ню нє достал обчековани заробок.

Того року зоз урожайом сої бул задовольни Янко Ждиняк зоз Шиду, хтори мал шейсц гольти „валєвки” у хотаре „Берак”. Натлачел 25 метери по гольту з влагу 10,5 одсто, а нєчистота була 2,5 одсто.

Янко Ждиняк

Янко Ждиняк

– Сою сом медзи першима витлачел и достал цену 40 динари по килограму. Влонї було 38 динари, алє соя нє зродзела вельо. И тераз продукователє могли достац 36 динари аконтну цену и чекац конєчни обрахунок. Мнє ше удало достац такой вигодну цену, бо так було на дзень кед сом придавал урожай. Сою сом прикармел, алє сом нє руцел штучни гной. Хто ище руцел и штучни гной, ище лєпше му зродзело, бо соя благочасово доставала диждж кеди требало – виприповедал Янко Ждиняк. Подобни бул и 2010. рок, а после того, по 2016. рок, хвиля нє була вигодна за продукцию сої.

(Опатрене 121 раз, нєшка 1)