На соботу почина Польопривредни саям

автор м. тамаш/я. дюранїн
455 Опатрене

НОВИ САД – 88. Медзинародни польопривредни саям и 53. Медзинародни саям лову и риболову и Саям Еколоґиї буду отримани од 18. по 24. септембер.

На Саям годни войсц нащивителє зоз диґиталним желєним сертификатом (потвердзенє о вакцинованю або о прелєжаним Ковиду-19), або неґативни швидки антиґенски, або ПСР тест. Тим котри нє буду мац анї єден од тих документох, Саям обезпечел на уходзе швидке антиґенске тестиранє котре ше нє будзе накнадно наплацовац, алє є ураховане до цени уходнїци. Уходнїца будзе иста як и прешлого року – поєдинєчна 600 динари, орґанизовани ґрупи буду ю плациц 400 динари, а пензионере, школяре и студенти у орґанизованих нащивох, як и дзеци од 7 до 12 роки уходнїцу годни купиц за 250 динари.

Медзинародни польопривредни саям ключна подїя у обласци аґробизнису у тей часци Европи и место на хторим Министерство польопривреди, лєсарства и водопривреди и шицки релевантни покраїнски и институциї и Город Нови Сад представяю субвенциї за польопривредну продукцию, а викладаче свойо найновши досяги у аґрару, продуктох и искуства.

Попри числених домашнїх викладачох, свой приход наявели и фирми зоз Ческей, хтора Жем партнер, Италиї, Шпаниї, Билорусиї, Польскей, Голандиї, Турскей…, як и зоз жемох у окруженю.

ПОВЯЗАНИ ТЕКСТИ