Перша сезона после войни – квалификацийна (VII)

автор Й. Грубеня
1.1k Опатрене

Перше повойнове стретнуце СК „Русин” бавел процив екипи СК „Цукровня” (Шечерана) зоз Червинки. Концом юлия Русин бавел вични дерби процив екипи з Лалитю. Як и вше после таких вельких войнох, бул то час кед шицко требало ознова порушац. Но, кед слово о спорту, нє требало му вельо часу же би завжал свойо место и значносц при людзох.

Фодбалски екипи у новей держави перше бавели приятельски стретнуца, а потим нєодлуга и першенствени стретнуца по срезох и городох. На тих просторох системи першенствених фодбалских стретнуцох у шлїдуюцих 10 рокох ше часто меняли, цо завишело од политики и власци. Система и ранґи першенствених стретнуцох у розвойней фази часто меняни и прешли през штири фази – перша фаза була од ошлєбодзеня по 1949. рок, друга фаза од 1950. року по конєц 1951. року, треца фаза була од 1952. до 1954. рок и штварта фаза од 1955. по єшень 1958. року.

ПРИЯТЕЛЬСКИ СТРЕТНУЦА

Од половки 1945. року и у векшей часци 1946. року у новей держави велї клуби бавели лєм приятельски стретнуца. Сезона 1945/1946. рок була квалификацийна за Першу союзну лиґу. Теди ше одбавели велї фодбалски стретнуца, а з цильом же би се пренашло наймоцнєйши екипи у Югославиї.

Такой по законченю Другей шветовей войни и ошлєбодзеню  Югославиї нашо „Руски новини” (число 4, 6. юлий 1945. рок) обвисцели своїх читачох же „7. юлия обновени СК „Русин” одбави свойо перше фодбалске змаганє на своїм терену процив СК „Шечерана” зоз Червинки, а наздаваме ше же ше му на длугей паузи заш зиду шицки нашо навияче. Такой други дзень на нєдзелю одбави ше реванш у Червинки.”

На стретнуцу у Руским Керестуре победзел СК „Русин” з резултатом 6:1 (1:1). У екипи Русина теди бавели: Такач – ст. Мудри, мл. Мудри – Ґнип, Чакан, Орос – Медєши, Папуґа, Надь, Баков и Планчак. Ґоли дали: Любомир Планчак Пуби 4 и Медєши 2.

У Руским Керестуре 31. юлия 1945. року одбавене стретнуце СК „Русин” – СК „Лалить”, Русин страцел з резултатом 3:4, а ґоли за Русин дал Медєши. Побиду вивойовала слабша екипа.

Русиново бависко нє було повязане, „бо його бавяче нє тримали свойо места, а госци були кус лєпши, алє барз слабо дисциплиновани” „Руски новини”, число 4, 6. юлий 1945. рок.

Русиновей Управи предкладали же би требало „вецей уваги покладац на складанє тима. Треба класц тих цо найлєпши. Бавяче ше пробую на тренинґу, а нє на стретнуцох. Зато би управи требало вецей ше постарац и за тренинґи, бо през тренинґа нєт утакмици. За добри тим потребно вибудовац техники, швидкосц, витирвалосц и повязаносц хлапцох” – „Руски новини”, авґуст 1945. рок.

Ривалитет двох сушедних валалох иснує и нєшка. Вше кед на шоре бавиц тот дерби, вельке интересованє за стретнуце.

ПОСЛЕ РЕВАНШУ РУСИН ВШЕ ЛЄПШИ

У єшеньскей змагательней часци у новембру 1945. року, на Митра, СК „Русин” госцовал у Лалитю. З тей нагоди резултат бул вельо лєпши як вяри – СК „Лалить” – СК „Русин” 1:5 (0:2). Русин бавел у составе: Ю. Надь, Я. Мудри, Й. Мудри, Ґнип, Дудаш – Рускаї, Медєши – Папуґа – Маркович – С. Надь – Стричко.

Пред малим числом патрачох Керестурци були вельо лєпши од домашнєй екипи. Ґоли за Русин дали: Медєши 2, Маркович, Дудаш и Папуґа.

Внєдзелю, 26. фебруара 1946. року, „фискултурне дружтво „Русин” отримало рочну схадзку. Стара управа дала кратки звит о роботи дружтва од ошлєбодзеня по нєшка. Тот кратки час дружтво було активне у возможних розмирох” – „Руски новини”, марец 1946. рок. На тей Рочней схадзки вибрани нови Управни одбор на чолє з предсидательом Дюром Павловичом и подпредсидателями Йовґеном Гардийом и Якимом Гафичом. Йовґен Гарди Мирґли бул задлужени за фодбал; пинґ-понґ водзел Йовґен Медєши; за просвитну роботу бул задлужени Янко Виславски, а за други секциї Яша Баков и Штефан Ґера.

После того, 17. марца 1946. року, у Руским Керестуре одбавене стретнуце СК „Русин” – СК „Вепровач” (Крущич). Победзел Русин зоз аж 9:0.

У новинским звиту у „Руских новинох” (29. марец 1946. рок) пише: „Внєдзелю 24. марца Русин одбавел свойо перше фодбалске стретнуце з Вепровачом. Гоч тото змаганє нє було обявене, зишло ше шумне число навиячох котре и попри досц жимней хвилї з интересованьом провадзело тото бависко.”

Русин бавел у составе: Колошняї – Мудри, Я. Мудри – Ґнип, Дудаш, Сеґеди – Медєши, Папуґа, Маркович, Горняк и Баков.

Ґоли дали: Горняк 3, Дудаш и Маркович по 2, а Папуґа и Баков по єден. У наших новинох окреме прекоментароване бависко бековскей пари Мудри – Мудри I: „…гоч су по рокох вецей як 15 роки єден од другого далєко, указую же ище длуго годни вєдно бранїц „животни” простор Русина.”

Интересантне ище повесц же ґолґетер Горняк Мезеш познєйших рокох бул вецей децениї гудак и грал на тамбури (бас прим) у Доме култури у Руским Керестуре и ансамблу „Кирданци”.

(Предлужи ше)

ПОВЯЗАНИ ТЕКСТИ