ВЕРБАС – Лїкаре Общого шпиталю Вербас ше стараю о здравю скоро 250 000 гражданох зоз седем општинох, а як пише портал РТВ, вельке число пациєнтох, мало кадри и части губеня медицинскей опреми, очежую роботу тей установи. Ґу тому, гражданє ше поносую на очежане заказованє и на длуги чеканя на специялистични препатрунки.
За окончователя длужносци директора Общого шпиталю Вербас пред штирома мешацами меновани др Милан Попов, уролоґ, до нєдавна заняти у Клинїчним центре Войводини, и як гварел за РТВ, дочекали го огромни длуства и вельке число погубених медицинских апаратох.
– Такой по пребераню длужносци зме рушели ришовац тоти проблеми – ЦТ-апарат знова функционує, поспишело нам ше оправиц апарат за рентґен, хтори нє робел рок и пол, сервисовали зме скоро шицки апарати – гварел о.д. директора Шпиталю др Милан Попов.
Робота Общого шпиталю Вербас очежана и пре нєдостаток кадрох. По нормативу му припадаю 104 лїкаре, а хибя 13, як и 65 шестри и 22 особи за роботу у технїчних службох, о чим обвисцене ресорне министерство.