НОВИ САД – На Новосадским сайме вчера, 6. марца, отворени 12. Саям образованя „Драгокази”, потим 23. Медзинародни саям кнїжкох и 22. Медзинародна вистава уметносцох „Арт експо”.
Манифестациї шветочно отворел министер просвити, науки и технолоґийного розвою Младен Шарчевич, котри визначел же пред пол рока у Сербиї було три профили дуалного образованя, а по конєц того рока ше обчекує медзи 17 и 20 нови образовни штредньошколски профили.
Саям образованя того року у знаку дуалного образованя и перспективи його запровадзованя у Сербиї. Така система образованя ма вельки предносци за школярох и за роботодавательох, алє же би зажила, потребне запровадзиц сотруднїцтво образовних институцийох и привреди, визначене на отвераню Сайму.
Покраїнски секретар за образованє, предписаня, управу и национални меншини-национални заєднїци Михаль Нїлаш з тей нагоди гварел же того року Саям образованя нащивя вецей як 8 000 штредньошколци з Войводини.
На Салонє кнїжкох, на штанду Покраїнского секретарияту за културу, явне информованє и одношеня з вирскима заєднїцами, вєдно з другима националнима заєднїцами, представена и видавательна творчосц на руским язику.
