НОВИ САД – Вирни з Вуковару и Осєку 23. децембра були на Служби Божей у церкви св. апостолох Петра и Павла у Новим Садзе, а потим ше дружели зоз домашнїма у церковней сали, дзе их привитали вирни, парох о. Юлиян Рац и предсидателька Културней ради парохиї Гелена Бабич.
Парох новосадски о. Рац бешедовал о историї церкви, парохиї и терашнєй ситуациї зоз констатацию же младих єст мало у церковним живоце цо, медзи иншим, пошлїдок мишаних малженствох, а госци зоз Горватскей гварели же подобна ситуация и у нїх.
– Бориме ше до остатнїх моцох. Виронауку маме каждей нєдзелї, алє ше муша уключиц родичи и послац и привесц дзеци. Лєм єдносц и заєднїцтво нас ратує. Прето, мили госци, частейше приходзце, и частейше нас волайце – гварел о. Юлиян, цо госци прилапели.