НОВИ САД – Тогорочна манифестация „Под корунами на Штранду”, хтора на тим новосадским купалїщу отримана уж шести раз, и того року, и попри нєстабилней хвилї, позберала млади любопитлїви дзеци хтори сцели дацо вецей научиц о меншинох коло себе. Манифестация мала циль промововац култури и язики хтори єст у Войводини, як и активне пребуванє у природи, а того року окрем мадярского, румунского и руского язика прешлих, того тижня ше учи знаковни язик.
Того року на роботньох було коло 15 дзеци, почали 30. юлия, а закончели ше пияток, односно всоботу 4. авґуста зоз преверйованьом знаня, у квизу. Квиз отримани на Штранду, а нє на локалитету „Рим” над Беочином пре подлу хвилю, дзе ше отримали прешлотижньово квизи.
Дзеци през роботнї водзели Маша Киндєр Петрич и Блаженка Хома Цветкович, а учело ше о историї Руснацох, їх култури, фестивалох, єдлох, як ше волаю фарби, числа, животинї, овоц и желєнява по руски…так же за тоти пейц днї дзеци могли научиц коло 100 слова, а 20 поняца на єдней роботнї.
Перше место освоєла Маша Сторожук Зелькови, друге Петко Цвиянович, а треце Вукаин Бубаня, и за заслужени труд и знанє достали пенєжни награди.
Орґанизатор манифестациї Херор Медия Понт, Городска библиотека и Центер за розвой меншинских и локакних медийох.
