Контроверзна тема о критериюмох на основи чого ше одредзи хто за заєднїцу визначна особа могла би добиц перши рационални розплєт. На схадзки Церковного одбору у Новим Садзе розпатрене предкладанє о поставяню памятних плочох визначним особом и одлучене же у церковней порти мож положиц лєм тоти котри ше одноша на церковни, пошвецени особи (опать текст на боку 15.).
Цо ше дотика памятних плочох котри ше одноша на визначни особи зоз цивилного живота новосадскей парохиї, вони можу буц поставени на окремним месце, док за тото буду обезпечени условия.
Главне питанє, котре ище скорей поставяло „Руске слово”, то дефинованє критериюмох за одлучованє – котри то особи буду визначени. Новосадски Церковни одбор ше поставел одвичательно и предклада же би ше уключели руски институциї и фаховци – Национални совит и Завод за културу войводянских Руснацох. Презвучала и поволанка же би ше зоз питанями нє лєм памятних плочох, алє и другей файти памятнїкох, визначним културним дїячом по шицких местох требало занїмац окремне фахове цело…
Конєчно з єдней инстанци порушана иницятива же би ше озбильно одлучовало о тим важним и одвичательним питаню.
Бо, то нє лєм у управних и месних одборох надгласац кому ше додзелї награди, або чийо мено будзе мац даєдна улїца. За визначну особу муши буц брилиянтна биоґрафия, упечатлїве животне дїло и нєупитни морал.
Вше ме фасцинує биоґрафия др Гавриїла Костельника – кельо язики знал, на келїх писал и у келїх жемох и варошох ше едуковал. Яке мал широке польо интересованя, а на початку ХХ вику.
Особнє шє заганьбим и припознавам же на початку ХХІ вику у наших можлївосцох – Костельник далєко опрез нас шицких у заєднїци. И попри шицким тим, анї єдна улїчка у його родним валалє до дзень нєшка нє ма його мено.
Ище єдно – Републични ґеодедски завод у своїм елаборату наводзи же на териториї Нового Саду єст вецей як 500 безменни улїчки, котри до конца рока муша достац назви. Чи маме порихтани свойо предклади?