РУСКИ КЕРЕСТУР – Основна школа (ОШ) „Петро Кузмяк” вчера уж пиятираз була домашня Квизу „Математика през бависко” у хторим ше змагали школяре пиятих класох зоз ОШ „Братство єдинство” з Коцура, ОШ „Петефи Шандор” з Кули и з домашнєй школи.
Перше место завжала домашня штирочлена екипа хтору рихтала наставнїца Наталия Будински, друга була екипа кулскей Школи хтору рихтала Славка Мармила, а треца коцурска екипа хторей математику преподава Татяна Пиксияда.
Квиз орґанизовала професорка математики у керестурскей Школи Леона Сабо вєдно зоз ґрупу ґимназиялцох, циль му друженє и промоция математики, а иницирали го з нагоди того же мешац май пошвецени математики.
У жирию були наставнїци Снежана Шанта з Коцура, Таня Таталович з Кули и директорка домашнєй Школи Хелена Пашо Павлович, провадзели го и други наставнїци, як и школяре-навияче зоз шицких трох школох.
На концу квиза директорка Пашо Павловичова учашнїком уручела дипломи и награди хтори обезпечела Школа и подзековала шицким же ше трудзели и участвовали.