МИКЛОШЕВЦИ (ГОРВАТСКА) – У Миклошевцох, у Републики Горватскей, 25. и 26. авґуста будзе отримана XXXIII по шоре Културна манифестация „Миклошевци 2018”.
У соботовей програми, 25. авґуста, у просторийох основней школи, на 18,30 г., будзе отворена вистава вишивкох КУД „Яким Ґовля”, а потим поетско-музични вечар на хторим будзе промовована кнїжка Агнетки Балатинац „Ґомбуля”, а буду участвовац и члени Женскей шпивацкей ґрупи КУД „Яким Ґовля”. У цаловечаршей програми, хтора почнє на 20 годзин, представя ше члени Руского културного центра з Нового Саду, зоз цаловечаршим концертом.
На нєдзелю, после покладаня венцох на 10,45, а потим и Служби Божей, коло 11,30 годзин очекує ше приход бициґлистох з Руского Керестура, а смотра фолклору „Поздрав ровнїни”, на хторей наступя вецей културно-уметнїцки дружтва, почнє на 15 годзин.
Тогорочна Манифестация „Миклошевци 2018” будзе отримана под покровительством Совиту за национални меншини Републики Горватскей, Општини Томпоєвци и Союзу Руснацох Републики Горватскей.
