ДЮРДЬОВ – Тогорочни, традицийни, 23. Фестивал жридлового шпиваня „Най ше нє забудзе”, будзе отримани на соботу, 22. авґуста у орґанизациї Културно-уметнїцкого дружтва „Тарас Шевеченко”.
Члени вецей наших дружтвох ше приявели за участвованє, а приход потвердзели: Хлопска шпивацка ґрупа зоз Руского културного центру з Нового Саду, Женска шпивацка ґрупа з Дома култури з Руского Керестура, Хлопска и женска шпивацка ґрупа зоз РКУД „Др Гавриїл Костелнїк” зоз Кули, Мишана шпивацка ґрупа Дружтва Руснацох зоз Суботици, Мишана шпивацка ґрупа КПД „Дюрда Киш” зоз Шиду и КПД „Карпати” зоз Врбасу, а спред домашнього дружтва, КУД „Тарас Шевченко”, наступи Женска шпивацка ґрупа.
Штредком тижня ше чекало потвердзенє од представительох КПД „Иван Котляревски” зоз Бикич Долу котрих на Фестивалу представи Мишана шпивацка ґрупа, а приход потвердзени и з наших дружтвох зоз Коцура, Нового Орахова, як и зоз Миклошевцох и Петровцох зоз Републики Горватскей.
Фестивал жридлового шпиваня „Най ше нє забудзе” почнє на 20 годзин у дворе Основней школи „Йован Йованович Змай”, а пополадню, на 18 годзин у Рускей школи будзе отворена тематична вистава „Дакеди було…”