НОВИ САД – Рубрика Тижньовнїк у 34. тогорочним числу новинох „Руске слово” приноши вистку же оформене Координацийне цело за запровадзованє Акцийного плану, як и звит зоз схадзки Роботного цела за младих на чиїм дньовим шоре було розподзельованє средствох по конкурсу.
Нашо места информую о трибини студентох и ушореню святочней сали Месней заєднїци у Дюрдьове, стану гайзибанскей драги на релациї Беоґрад–Шид, як и о напартей роботи огньогасцох зоз наших местох у гашеню огня на териториї цалей держави.
Економия у тим чишлє спатра урожай слунечнїку и преноши атмосферу зоз першого „Преображеньского базару” у Шидзе, док на бокох Култури и просвити мож пречитац интервю зоз нашу оперску шпивачку Люпку Рац. Важни теми о хторих ту пише то и знїманє шпиванкох виведзених на тогорочним „Червеним пупчу” и же анї наиходзацого школского року у дюрдьовскей школи нє будзе уписане оддзелєнє на руским язику.
Рубрика Людзе, роки, живот пише о младому швичкарови Давидови Будинскови зоз Дюрдьова, док Дружтво понука седме предлуженє фельтону „Як гуторя нашо дїдове – швет бул давно иншаки” о. Владимира Еделинския Миколку.
Як преславена Велька Матка Божа у керестурскей парохиї и о чим ше бешедовало на стретнуцу зоз Таню Рибович з Нємецкей у дюрдьовскей парохиї пише на бокох Духовного живота.
Спорт приноши вистки зоз Карате клубу „Русин”, змаганю у кошарки „3 на 3”, а ту и резултати зоз перших стретнуцох наших фодбалских клубох на початку новей сезони.
У тим чишлє од додаткох вишли Дом и фамелия и Руске словечко.