СУБОТИЦА – Припаднїки меншинских елитох векшином задовольни з информованьом Радио-телевизиї Войводини о своєй националней меншини, а нєзадовольни з информованьом о тим на Радио-телевизиї Сербиї – резултати виглєдованя Центру за розвой цивилного дружтва обявени у публикациї „Информованє на язикох националних меншинох”, хтора вчера представена у Суботици.
Часточне и цалосне задовольство з информованьом РТВ о меншинох виражела скоро половка випитованих, док неґативне думанє маю лєм штири одсто анкетованих. Виглєдованє указало и же найзагроженши друковани медиї.
Як гварене на представяню публикациї, за остатнї дзешец роки буджетна потримовка меншинским медийом зменшана зоз три на два милиони еври, док число хасновательох звекшане.
Попри з финансийнима проблемами, меншински медиї, окреме друковани, зочую ше и з нєпреривним зменшованьом числа читачох. Як поведзене, їх будучносц можебуц будзе интернет.
Меншински друковани медиї читаю „елити” – адвокати, лїкаре, инжинєре… котри у контакту з менєй образованима сонароднїками, без котрих „нєт очуваня глїбших пасмох националних идентитетох”. Прето, як поведзене на представаяню спомнутей публикациї, меншински друковани медиї нєобходни, без огляду чи су економични.
Виглєдованє указало и же векшина випитованих задовольна з информованьом о меншинох на Радио-телевизиї Войводини. Кед у питаню информованє о їх националней заєднїци, окрем горватскей елити, нєт нєзадовольних.
Цалосне задовольство з информованьом о єй заєднїци указує 80 одсто рускей елити, 56 одсто румунскей, 29 одсто мадярскей и 13 одсто словацкей елити.