ДЮРДЬОВ – Пред централну програму на тогорочним Фестивалу жридлового шпиваня „Най ше нє забудзе”, у дворе опрез будинку КУД „Тарас Шевченко” у Дюрдьове, вчера на 16 годзин отворена вистава з назву „Стари ремесла”.
На вистави представени стари ремесла, та ремеселнїки на вецей штандох викладали свойо продукти и указовали з ориґиналнима старима алатами як ше их хасновало за одредзени роботи.
Свойо виробки и алат представели Дюрдьовчанє токар Янко Хромиш, водоинсталатер Яким Чапко, коваль Яким Барна и Яким Гарди, ковальов син, котри виложел оцов алат, як и цукрарка Миряна Миливоєв з Чуроґу.
За окремним штандом дзивчата з домашнього Дружтва прикрашовали солянки з древа котри направел токар Хромиш, а таки яки ше дакеди ношело на польо.