РУСКИ КЕРЕСТУР – Вчера вечар у Велькей сали Дому култури орґанизовани удатни гуманитарни концерт за Наташу Ґайдош на котрим як добродзечни прилоги назберане шицкого 55 000 динари. На концерт пришла и Наташа зоз родичами, котра иншак зоз Коцура, а нєдавно чежко настрадала у транспортним нєщесцу.
Назберани пенєж зоз уходнїцох котри коштали 100 динари, а одволанє Керестурскей публики було красне, бо була скоро полна сала. Добродзечни прилог подаровани и до окремней шкатули, а ураховани и пенєж од предатих медовнїкох котри за тоту нагоду подаровала професорка филозофиї Данка Мекич Попович.
Концерт орґанизовали керестурски штредньошколки Марина Роман, Йована Ноґавица, Кристина Гайдук, Саня Чапко, Николина Шарич и Кристина Афич хтори на Концерту и наступели як шпивацка ґрупа и виведли дзевец рижни композициї.
На ґитари их провадзела Марина Роман, а у дзепоєдних нумерох и Марко Буила на гушлї и на ґитарох Жарко Остоїч и Павле Рац. Зоз двома шпиванками наступел и Дзецински хор Дому култури Руски Керестур „Шкорванчки” под руководзеньом Лидиї Пашо.
Свойо доприношенє дали и рецитаторе Иван Планчак хтори ревитовал писню „Страх” и Мирослав Малацко котри пречитал Ґандийово слова о гуманосци и любови, а конферансу водзела Адриана Надь.
На концу Концерту публика з моцним аплаузом потримала Наташу у єй борби за успишну регабилитацию, а орґанизаторки єй уручели и дарунок.
У орґанизациї Концерту окреме помогли Дом култури Руски Керестур и велї поєдинци и спонзоре.